ब्रहमदेव मेहता
हरिनगर । सुनसरीको हरिनगर गाउँपालिका–७ का सज्जाद अंसारीलाई बन्दुकसहित पक्राउ गरिएको छ।
आज केही बेर अगाडी घुस्की क्षेत्रमा दुई जनाबीच सामान्य भनाभनबाट सुरु भएको विवाद चर्किएपछि अंसारीले बन्दुक निकालेर आक्रमण गर्ने प्रयास गरेको आरोप लागेको छ।
घटनास्थलमा रहेका स्थानीयवासीका अनुसार, दुई जनाबीच कुनै विषयमा भनाभन भइरहेको थियो। एक्कासी अंसारीले आक्रोशमा आएर साथमा ल्याएको बन्दुक झिकेपछि स्थिति तनावग्रस्त बनेको थियो। गोली चल्न सक्ने सम्भावना देखिएपछि स्थानीयले तुरुन्तै प्रहरीलाई खबर गरेका थिए।
प्रहरी चौकी घुस्कीबाट खटिएको टोलीले तुरुन्तै घटनास्थल पुगेर अंसारीलाई बन्दुक सहित नियन्त्रणमा लिएको थियो। पक्राउका क्रममा प्रहरीले उनको साथबाट सो बन्दुक समेत बरामद गरेको जनाएको छ।
एक प्रहरी अधिकारीले भने, “दुई जनाबीचको विवादमा एक पक्षबाट बन्दुक निकालिएको सूचना पाउँदै हाम्रो टोली तत्काल घटनास्थल पुगेको थियो। बन्दुकसहित एक जनालाई पक्राउ गरी थप अनुसन्धानका जिल्ला प्रहरी कार्यालय सुनसरी पठाईएको छ।”
अहिले अंसारीमाथि हातहतियार देखाएर डरत्रास फैलाएको, सार्वजनिक सुरक्षामा खतरा उत्पन्न गराएको, र हातहतियार (नियन्त्रण) ऐन अन्तर्गतको अभियोगमा अनुसन्धान अघि बढाइएको प्रहरीले जनाएको छ।
प्रहरीका अनुसार घटनामा अरु कोही घाइते भएको विवरण भने अहिलेसम्म प्राप्त भएको छैन। पक्राउ परेका अंसारीसँग उक्त बन्दुक कहाँबाट आएको हो भन्ने विषयमा पनि अनुसन्धान भइरहेको छ।
थप विवरण आउन बाँकी……….
